អ្នកជំនាញកិច្ចការអន្តរជាតិលើកឡើងថា វិបត្តិអ៊ុយក្រែន (Ukraine) នឹងរឹតតែធ្វើឱ្យកម្ពុជាក្នុងនាមជាប្រធានប្តូរវេនអាស៊ាន កាន់តែពិបាកក្នុងការដឹកនាំអាស៊ានថែមទៀត។ ការលើកឡើងនេះ កើតមានឡើងស្របពេលដែលប្រទេសរុស្ស៊ី (Russia) បានចាប់ផ្តើមឈ្លានពាន និងបើកការវាយប្រហារយោធាទៅលើតំបន់នានានៃប្រទេសអ៊ុយក្រែន កាលពីថ្ងៃទី២៤ ខែកុម្ភៈ។
ការបើកការវាយប្រហារ និងឈ្លានពានទៅលើប្រទេសអ៊ុយក្រែនពីសំណាក់កងទ័ពរុស្ស៊ីនាពេលនេះ កំពុងក្លាយជាប្រធានបទក្តៅមួយ ដែលពិភពលោកកំពុងតាមដានយ៉ាងយកចិត្តទុកដាក់។ បើទោះបីជាកម្ពុជា និងតំបន់អាស៊ីអាគ្នេយ៍ទាំងមូលនៅឆ្ងាយពីអ៊ុយក្រែនជិតពាក់កណ្តាលពិភពលោក ហើយអាចប្រើពេលប្រមាណ ១០ម៉ោងតាមជើងហោះហើរក៏ដោយ ក៏វិបត្តិនេះទំនងជាជៀសមិនផុតពីអាចជះឥទ្ធិពល និងផលប៉ះពាល់អវិជ្ជមានតិច ឬច្រើនមកលើតំបន់នេះដែរ។
អ្នកជំនាញកិច្ចការអន្តរជាតិ យល់ថា វិបត្តិ ឬសង្គ្រាមឈ្លានពានអ៊ុយក្រែនពីសំណាក់ប្រទេសរុស្ស៊ី ដែលដឹកនាំបុរសខ្លាំងខាងផ្ដាច់ការ គឺប្រធានាធិបតី វ្ល៉ាឌឺមៀ ពូទីន (Vladimir Putin) នេះ នឹងរឹតតែធ្វើឱ្យកម្ពុជាក្នុងនាមជាប្រធានប្តូរវេនអាស៊ានពិបាកក្នុងការដឹកនាំអាស៊ានថែមទៀត។ ការណ៍ដែលពិបាកនេះគឺដោយសារតែបញ្ហាសន្តិសុខនៅអ៊ុយក្រែននេះ អាចធ្វើឱ្យប្រទេសសមាជិកអាស៊ានមួយចំនួនមានជំហរខុសៗ គ្នា ស្របពេលដែលកម្ពុជាជាប្រធានអាស៊ានខ្លួនឯងមានទំនាក់ទំនងជិតស្និតជាមួយរុស្ស៊ី។
សាស្ត្រាចារ្យ និងជាព្រឹទ្ធបុរសរងនៃកម្មវិធីសិក្សាថ្នាក់បរិញ្ញាបត្រផ្នែកអភិវឌ្ឍសាកលនៃសាកលវិទ្យាល័យអារីហ្សូណា ស្តេត (Arizona State University) នៅសហរដ្ឋអាមេរិក បណ្ឌិត អៀ សុផល រំពឹងថា បើទោះបីជាកម្ពុជាមានទំនាក់ទំនងល្អជាមួយរុស្ស៊ីក៏ដោយ ក៏រដ្ឋាភិបាលភ្នំពេញអាចនឹងធ្វើតាមជំហររបស់ក្រុងប៉េកាំង (Beijing) នៃប្រទេសចិនកុម្មុយនិស្តជុំវិញបញ្ហាវិបត្តិអ៊ុយក្រែននេះ ព្រោះកម្ពុជាមានទំនាក់ទំនងស្អិតល្មួតជាមួយចិន។ លោកថា កម្ពុជាអាចនឹងបញ្ជាក់ជំហរដូចចិនដែរថា ខ្លួនរន្ធត់ ឬភ្ញាក់ផ្អើលដោយសារការវាយប្រហារនេះ និងថា បូរណភាពដែនដីរបស់អ៊ុយក្រែនគួរតែត្រូវបានគោរព។
ចិនពុំបានថ្កោលទោសសង្គ្រាមឈ្លានពានរបស់រុស្ស៊ីនៅអ៊ុយក្រែននេះទេ។ ក៏ប៉ុន្តែ ប្រទេសនេះបែរជាទម្លាក់កំហុសដាក់សហរដ្ឋអាមេរិកថា ជាអ្នកបញ្ឆេះឱ្យមានសង្គ្រាមនេះទៅវិញ។
កម្ពុជាក្នុងនាមជាប្រធានប្តូរវេនអាស៊ានក៏នៅមិនទាន់ចេញសេចក្តីថ្លែងការណ៍ថ្កោលទោសទង្វើរបស់រុស្ស៊ីនេះនៅឡើយដែរ។ អ្នកនាំពាក្យក្រសួងការបរទេសកម្ពុជា លោក ជុំ សុន្ទរី ប្រាប់វិទ្យុអាស៊ីសេរីយ៉ាងខ្លីថា កម្ពុជាកំពុងរៀបចំចេញសេចក្តីថ្លែងការណ៍រួមក្នុងចំណោមសមាជិកអាស៊ានដើម្បីបញ្ជាក់ជំហរជុំវិញបញ្ហាអ៊ុយក្រែននេះ។ លោកក៏នៅមិនទាន់ឆ្លើយតបនឹងសំណួរវិទ្យុអាស៊ីសេរីថាតើមានពលរដ្ឋ សិស្ស និងនិស្សិតកម្ពុជាប៉ុន្មាននាក់កំពុងស្នាក់នៅក្នុងប្រទេសអ៊ុយក្រែន និងថាតើកម្ពុជាមានគម្រោងជម្លៀសពួកគេដែរឬអត់នោះទេ។
ថ្លែងនៅក្នុងសន្និសីទកាសែតរួមគ្នាជាមួយនាយករដ្ឋមន្ត្រីម៉ាឡេស៊ី ដែលកំពុងធ្វើទស្សនកិច្ចផ្លូវការនៅកម្ពុជាកាលពីថ្ងៃទី២៤ ខែកុម្ភៈ លោកនាយករដ្ឋមន្ត្រី ហ៊ុន សែន មិនបានថ្កោលទោសរុស្ស៊ីនោះទេ។ លោកបានអំពាវនាវឱ្យមានកិច្ចសន្ទនា និងដំណោះស្រាយដោយសន្តិវិធីចំពោះបញ្ហារុស្ស៊ី និងអ៊ុយក្រែននេះ៖ «ពិតហើយអ្វីដែលយើងចង់ឃើញគឺដំណោះស្រាយដោយសន្តិវិធី។ នៅទីនេះ យើងមិនមានកុងសង់ស៊ីសលើសេចក្តីថ្លែងការណ៍ណាមួយរបស់អាស៊ានទេ។ ខ្ញុំជាមួយនឹងឯកឧត្តមនាយករដ្ឋមន្ត្រី អ៊ីស្មាអែល បាននិយាយយ៉ាងច្បាស់ថា អាស៊ានត្រូវការសំឡេងរួមទើបអាស៊ានខ្លាំង។ អ៊ីចឹងរាល់ការធ្វើសេចក្តីថ្លែងការណ៍ណាមួយចាំបាច់ត្រូវមានកុងសង់ស៊ីសក្នុងចំណោមអាស៊ាន។ ប៉ុន្តែ ព្រឹត្តិការណ៍នៅអ៊ុយក្រែនជាការណ៍ដែលយើងយកមកពិភាក្សាក្នុងភាពស្ងាត់ស្ងៀម។ ឯកឧត្តមនាយករដ្ឋមន្ត្រី អ៊ីស្មាអែល និងខ្ញុំ គឺបានយល់ស្របគ្នាថា ទាមទារនូវកិច្ចសន្ទនា និងដំណោះស្រាយដោយសន្តិវិធី»។
អ្នកជំនាញកិច្ចការអន្តរជាតិ បណ្ឌិត អៀ សុផល ថា សមាជិកអាស៊ាននឹងមានជំហរខ្វែងគ្នាជុំវិញបញ្ហាអ៊ុយក្រែននេះ ខណៈវៀតណាមអាចជំទាស់នឹងបញ្ហានេះ ព្រោះប្រទេសនេះធ្លាប់ជាសម្ព័ន្ធមិត្តរបស់អតីតសហភាពសូវៀតកាលពីពេលអតីតកាល។ យ៉ាងណាលោកថា ដោយសារតែឥឡូវនេះ កម្ពុជា និងឡាវ មានទំនាក់ទំនងជិតស្និទ្ធជាមួយប្រទេសចិន ដូច្នេះប្រទេសទាំងពីរនេះទំនងជានឹងរង់ចាំស្តាប់ការណែនាំការមួយពីទីក្រុងប៉េកាំងជាមុនសិន។
ក្រោយរុស្ស៊ីបើកការវាយប្រហារទៅលើប្រទេសអ៊ុយក្រែន កាលពីថ្ងៃព្រហស្បតិ៍ ក្រុមមេដឹកនាំនៃប្រទេសលោកខាងលិចបានហៅអំពើឈ្លានពានរបស់រុស្ស៊ីថាជាអំពើ «ឃោរឃៅ» និងបានសម្រេចដាក់ទណ្ឌកម្មសេដ្ឋកិច្ចមិនធ្លាប់មានពីមុនមកទៅលើវិមានក្រឹមឡាំង (Kremlin)។ ក្រុមប្រទេសលោកខាងលិច និងសម្ព័ន្ធមិត្តរបស់ខ្លួន មិនបានបង្ហាញចេតនាណាមួយពីការបញ្ជូនកងទ័ពរបស់ប្រទេសពួកគេទៅជួយប្រទេសអ៊ុយក្រែននោះទេ ដោយសារការណ៍នេះអាចនឹងបណ្តាលឱ្យមានសង្គ្រាមកាន់តែធំនៅអឺរ៉ុប។
សេចក្តីរាយការណ៍បឋមគិតត្រឹមយប់ថ្ងៃទី២៤ ខែកុម្ភៈ បើតាមទីប្រឹក្សាប្រធានាធិបតីអ៊ុយក្រែន ឱ្យដឹងថា ទាហ៊ានអ៊ុយក្រែនប្រមាណជាង ៤០នាក់ និងពលរដ្ឋស៊ីវិលយ៉ាងហោចណាស់ ១០នាក់ បានស្លាប់ក្នុងអំឡុងពេលរុស្ស៊ីបើកការឈ្លានពាននេះ។ អ៊ុយក្រែននិយាយថា កងទ័ពរុស្ស៊ីប្រមាណ ៥០នាក់ត្រូវបានសម្លាប់ ខណៈយន្តហោះរុស្ស៊ីចំនួន ៦គ្រឿងត្រូវបានបាញ់ទម្លាក់ តែព័ត៌មាននេះពុំមានការផ្ទៀងផ្ទាត់នៅឡើយទេ។ នេះបើយោងតាមសេចក្តីរាយការណ៍របស់សារព័ត៌មានអង់គ្លេស ប៊ីប៊ីស៊ី (BBC)។
កម្ពុជាមានទំនាក់ទំនងជិតស្និទ្ធជាមួយប្រទេសរុស្ស៊ីតាំងពីសម័យសង្គ្រាមត្រជាក់មកម្ល៉េះ ដែលពេលនោះរុស្ស៊ីនៅជាសហភាពសូវៀតនៅឡើយ។ គឺសហភាពសូវៀតនេះហើយដែលជាអ្នកនៅពីក្រោយចាំជួយឧបត្ថម្ភសង្គ្រាមឈ្លានពានរបស់វៀតណាមមកលើកម្ពុជាដើម្បីផ្តួលរំលំរបបខ្មែរក្រហមដែលមានចិននៅពីក្រោយ។ កម្ពុជា និងវៀតណាមកាលនោះគឺជាកូនអុករបស់សហភាពសូវៀត។ ក្រោយការឈ្លានពាននេះ វៀតណាមដែលបានលើកបន្តុបក្រុមមេដឹកនាំកម្ពុជាឱ្យឡើងកាន់អំណាចរហូតដល់សព្វថ្ងៃនេះ បានត្រួតត្រា និងគ្រប់គ្រងប្រទេសកម្ពុជាពេញមួយទសវត្សទី៨០។ បើកុំតែមានការបញ្ចប់ទៅនៃសង្គ្រាមត្រជាក់ដោយសារការដួលរលំទៅនៃសហភាពសូវៀត ដែលបើកផ្លូវឱ្យមានកិច្ចព្រមព្រៀងសន្តិភាពក្រុងប៉ារីសកាលពីឆ្នាំ១៩៩១ នោះទេ វៀតណាមដែលជាអតីតចៅហ្វាយនាយរបស់លោក ហ៊ុន សែន ក៏ទំនងជានឹងមិនងាយដកទ័ព និងបញ្ឈប់ការត្រួតត្រាដោយខុសច្បាប់របស់ខ្លួននៅកម្ពុជានោះដែរ។
Sponsor by : | W88 Cambodia
ប្រភព ៖
0 comments:
Post a Comment